Rogstaekerspreens 2014!!

Lennart 1e (Stultiens) uutgerope tot Rogstaekerspreens 2014.

Zaoterdig 18 jannewari és nao aafloup van de Gala Boonte Aovendj tot Stadspreens van Wieërt uutgerope Lennart 1e Stultiens. De nówwe Preens és ‘ne zoeën van Léon Stultiens, ouch waal bekindj as Lei vanne Köster en Annemiek Stultiens – Lambers. De kösvörse Preens woeëntj same met zien veervoeter en hônd Beau op de Ophovenstraat 8 in Wieërt. Preens Lennart gieët neet allein doeër ‘t laeve en hieët ‘n relâsie met Nannie van de Waarenburg uut Ospel.

Preens Lennart (33) is geine onbekindje in ‘t vastelaovendjwêrreldje. Oeëze Preens és opgegrudj in ‘n hoêshaoje woeë ‘t van 11 november wes aswoonsdig allein mer vastelaovendj woor waat de klok sloog. Met vader Léon en mooder Annemiek allebej lid van de ongertösse al 46 jaor bestaondje vastelaovendjvereniging De Dorstvlieëgels és de vastelaovendj aan oeëze Preens met de paplieëpel ingegaeve. Daonaeve waas vader Léon ouch nog ‘s jaorelângk regisseur van de Wieërter Boonte Aovendje. Ouch de Wieërter optocht waas vör oeëze Hoeëgheid neet vrieëmdj, as kleîn menneke leep hae al beej de Dorstvlieëgels mej inne optocht as bordjesdrager en op latere laeftiêd noom hae zêlf dael aan de optocht met de vrîndegroep De Brandjblussers.

Op sportief gebied és oeëze Preens lid van Tennisklup de Rayprickers en stieët hae regelmaotig op ‘t véldj um ‘n bélke te slaon. Op bestuurlik vlak es Preens Lennart ouch aktief, zoeë és hae inmiddels al drej jaor vuuërzitter van Dames 1 beej Top volleybal Irmato VC Weert, daonaeve és hae ouch nog ‘s aktief in ‘t bestuur van de Verbinderij, woeë-onger Perron C en Zone B valle. Dit alles met völ inzet en plezeer vör oeës Wieërter gemeinschap en stad.

Vanaaf 2011 és oeëze Hoeëheid zien eîge bedriêf begonne onger de naam Stultiens Recruitment, ‘n full service Werving & Selectie- en detacheringsbureau, gevestigdj in Wieërt en es hae inzetbaar vör komplieëte deenstverlieëning op ‘t gebeed van personieëlswêrving en advies. ‘t Aafgeloupe jaor és dao JobsInMechatronics (JIM) beej gekaome waat hae same met twieë partners runtj.

De Orde di-j  Preens Lennart hieët ingesteldj és de “Orde van Mien Wieërter Stedje”

Umdét oeëze Preens völ met Wieërt hieët woeëbeej nog ‘s beejkeumtj det de Rogstaekers eur 8 x 11 jaorig jubileum veere en Wieërt nog ‘s 600 jaor stadsrechte hieët wiltj Preens Lennart 1e gaer de vastelaovendj ingaon onger zien devies:

“Mer nów…., Efkes waat Ângers, met OS in Wieërt”

Leenk nao de Preensepagina

Reageren op Lennart Stultiens Rogstaekerspreens 2014!